Hata pasonang roa

 ----Tubu ni marga---


 oo ale si bayo lubis
jago ma au ulang maturgis
muda dibaen ho do au tangis
i rohakkon ho gabe halis
pangidoon ulang au silap
cintami torus do marlangkap
anak namboru bayo harahap
andigan sajo pasti di alap
oo ale si bayo suti

rohaon ulang ma hanciti

muda tarlanjur maho sanoli

saumur hidupmu au inda parduli

kehe do au manyunduti

bayo na tama boti na jogi

anak namboru bayo rangkuti

ari ari do au diligi

oo.. ale bayo dalimunthe

muda adong rohamu marripe

ompoti do pature ma sude

ulang taonon mu na lepe-lepe

tu anak namboru do au kehe

ujung na ho gabe lute

dotong do ia painte

ima si ganteng bayo daulae

oo.. ale bayo matondang

muda roho dongan martandang

ulang baen na alang-alang

au pe indabe jad ibimbang

ingot ma ulang sampe tarlambat

sosak ma koum anso marluhut

anak namboru madung mangambat

turunan ni bayu hutasuhut

Oo ale si bayo rambe

parange mi angkon do pature

muda di baen tu au naso pade

sidung na rasoanmu do na garse

rohaon muda sompat mandele

angggo ho baya gabe gale

muda marbagas au ho bile

tu anak namboru si bayo pane

oo ale si bayo tanjung

ulang ma baen au tarsinggung

iboto ho do au giot i sanjung

harana au boru na anggun

bope au halak na parsobar

ulang sanga rohakku marputar

tu anak namboru si bayo regar

sidenggan roha boti maol gusar

oo.. ale bayo batubara

rohakkon ulang baen jora

mata ku asal madung do rara

ho juo do anon namarmara

ulang sanga rohaku indara

upaboha ma tu ho osa

anak namboru bayo namora

burju rohana boti na barsa

oo ale bayo pulungan

au mada boru suti sian panyabungan

boru na enjeng boti oloan

bahat do ami di panyabungan

muda dibaen naso denggan

adong doi bayo pangaduan

anak namboru malojaan

ima manjutak bayo hasibuan...